Мұғалімдер, ұстаздар туралы

Екінші адам.

Бір ұстаз айтыпты:

—                  Қандайда болмасын жұмыс басталса, оны аяқтайтын екінші адам табылады, Қай жұмысты болмасын дұрыс бастау керек, сонда екінші адамның рахметтен басқа айтары болмайды,— депті.

Үйрену

Бір ұстаз айтыпты:

—                 Қандайда болмасын жұмысты меңгеру үшін бірак әдіс бар, ол — үйрену.

Абонемент

Сабаққа кірген инспектор:

—                Сабағың мақсатына жете алмады, дипломың бар ма?— депті.

—                Диплом бар, стаж да жетерлік,— депті мұғалім.

—                Жолдас мұғалім, димломыңыз абонементке айналып кеткен екен,— депті.

Мұғалім үнсіз отырып қалыпты.

Қиын бала

Мұғалім ата-аналар  жиналысын өткізіп, аяқтап қалғанда, бір ана:

—                 Қиын балалар туралы көп айтып жатырсыз, сонда олар мектепке қайдан келеді?— деп сұрапты.

Сонда мұғалім аз ойланып, былай депті:

— Қиын балалар біздерден, осы отырған сіздерден, достардан, жолдастардан, ағайын-туғандардан, апайлар мен сіңлілерден келеді,— депті.

Бала ісінен

— Шындықты баланың қай жерінен іздеу керек? —деп сұрапты мұғалімнен баланың шешесі.

Сонда мұғалім:

—               Шындықты баланың бойынан іздемеңіз, істеген ісінен, айтқан сөзінен іздеңіз,— депті.

Дәлелді жауап

Сабаққа қатысқан мектеп инспекторы мұғалімге:

—                 Оқушы жауап беріп тұрғанда, сіз мына сөзді өте жиі қайталайсыз, «дәлел келтір, дәлел келтір» деп, оны азайтқан дұрыс сияқты, — депті.

Сонда мұғалім:

—               Оқушыдан дәлелді жауап естісем, бір кітап оқып шыққандай боламын, сабағым тез бітетін сияқты,— депті.

Мәжбүрлік

Тәртіп бұзған баланы мүғалім кластан шығарып жіберіпті, оны көріп қалған мектеп директоры:

— Қымбатты ұстаз, баланы сабақтан қуып шығуға болмайды ғой,— депті.

Сонда ұстаз:

—         Адамның көңілін қалтырғым келмейді, бірақ өзі мәжбүр етеді,— депті.

Ақылды

—              Ақылды адамда ерге біткен сабырлық, анаға тән нәзіктілік қасиеттері әр кез сезіліп тұрады,— депті бір ұстаз.

Үздіксіз

—               Оқу мен ізденуді үздіксіздікке айналдырған оқушы ғана мақсатына жете алады,— депті мұғалім.

«Күшті дайындық»

Бірінші мүғалім:

—     Сіз кешке дайындалып жатырсыз ба?

Екінші мұғалім:

—     Қайдағы кеш?

Бірінші мұғалім:

—     Тақырыптық кеш ше?

Екінші мұғалім:

—     Ә, қолым тимей қалды, осы жұмада бастаймын.

Бірінші мұғалім:

—     Жұма бітуіне екі-ақ күн қалған жоқ па?

Фамилиясын атаған жөн

—     Мына қағаздарды шашқан сен бе?— депті мұғалім оқушыға.

—     Мен емес,— депті оқушы.

Сонда мұғалім:

— Иә, сен емессің, кешіріңіз, бірақ шашқан Асанов, —депті. (Ол сол оқушының өзі еді). Содан кейін оқушы күліп, кешіріңіз деп шашылған қағазды жинай бастапты.

Пікірлер

     Кезекшілікке кешігіп келген мұғалімде бір-ақ ой бар: «Кезекшілікті директор атқара тұрар».

     Класс жетекшісінің шәкіртке айтатын ақылы: «Қателіксіз жұмыс та бітпейді, бірақ күнде қателесуге болмайды.

     «Білім алу» атты тәрбие сағатында класс жетекшінің айтқан өсиеті: «Білім алу дегеніміз — құмнан алтын тергендей». «Білім алу дегеніміз — жатпай—тұрмай оқып, жаңылмай айту».

     Мектеп инспекторының жазып кеткенінен: «Сабақтағы қиындықты оқушы жасамады, мұғалім өзі тудырды...»

     Сабаққа кірген инспектордың айтқаны: «Жаңа сабақ мұғалімнің жүрегінде қуаныш таппады, сондықтан оның оқушыға әсері аз болды!», «Сапа бесжылдығын да отырып, әлгі есепте сатылған товардың сапасы туралы аузыңызды ашпай-ақ кеттіңіз!».

     «Егер оқушы бір апта сабаққа дәптерсіз келсе, онда жанұяның балаға деген қамқорлығы нактылы болмағаны»,— депті класс жиналысында мұғалім.

         Сабаққа кірген директор: «Оқушы бірінші күні дәптерін, келесі күні каламын, арғы күні кітабын ұмытып кетсе, онда төртінші күні мұғалім үшеуін де өзі алып келуі керек»,— депті.

     Оқу ісінің меңгерушісі: «Оқушы екі-үш мәрте еденді жумай кетсе, онда класс жетекшісі мен шәкірті орындарын ауыстырғандары жөн»,— депті.

     Оқу ісінің меңгерушісі: «Оқушы күнделікті тапсырмасын орындамаса, онда мұғалім оқушыны екі қолынан да мықтап ұстауы керек»,— депті.

     Сабаққа кірген оқу ісінің меңгерушісі: «Оқушы сабақ үстінде үздіксіз тәртіп бұзса, онда шәкірт ұстаздың бір олқылығын сезіп қалғаны»,—депті.

     Мұғалім айтыпты: «Оқушы сабаққа кешігіп келсе, онда екі түрлі себеп бар: біріншісі — сабаққа өте жақсы дайындалған, екіншісі — ешқандай дайындықсыз келген»,—депті. Ләйім, ылғи біріншісі қайталана берсе, кешіксе де, кемшілігі болмас еді.

         Бір директор: «Шәкірттерге үзіліс кезінде дәлізде жүгірме десек, онда үзілісті де сабаққа айналдырып жіберелік»,— депті директор сын айтқан инспекторға.

         Директор мұғалімге: «Баланың партаға сурет салуын тоқтатқыңыз келсе, оған екі-үш сурет альбомын әкеліп беріңіз»,—депті.

         Сабаққа қатысқан инспектор: «Оқушы сабақ үстінде күле берсе, оған күлкіңді өзің ғана естіп, біл де»,— депті мұғалімге.

         Инспектор айтыпты: «Жас мұғалімнің сабағына таңдау жасай бастасаң, «Әуелі өзім айтып берейінші»,— дейді.

Бас ие алмайды.

—     Рухани адам күші қандай техниканың алдында болсын, бас ие алмайды, себебі ол техниканы жасаушы адамның өзі, — депті мұғалім шәкіртіне.